فتحي عبد الوهاب: ”مش بزعق في البيت وبحترم المرأة جداً”

كشف الفنان فتحي عبد الوهاب، أن شخصيته الحقيقية بعيدة كل البعد عن رفع الصوت في المنزل، مؤكدًا أنه يكنّ احترامًا شديدًا للمرأة. وقال:"مش بزعّق في البيت، وبحترم المرأة بشدة، لأنها قبل ما تكون زوجة، هي أمي وأختي وبنتي وخالتي وعمتي وأستاذتي وجارتي... المرأة نصف المجتمع".

وتابع، خلال لقائه في برنامج "كلمة أخيرة" على قناة ON مع الإعلامية لميس الحديدي:"لو افترضنا إن المجتمع جسد واحد، من غير المرأة الجسد مش هيشتغل بنصه... هيعطّل".

وحول كونه ديمقراطيًا أم ديكتاتوريًا في حياته، قال:"في الأمور المتعلقة بالخبرة في الحياة مع ابني، مش ديمقراطي، لأن الأمر له علاقة بالتجربة. بقوله: أنا شايف كذا، والطريق ده هيوصلك لكذا... خُد بالك".

وردًا على سؤال الحديدي: "انطباع الناس عنك إنك شخص شبه الصندوق المغلق، مش معروف عنك حاجات كتير... أنت قاصد تكون كده؟"أجاب عبد الوهاب:"بالعكس، مش بسعى إني أكون صندوق مغلق، لكن شايف إن كل ما يتعلق بالحياة الخاصة لا يخص العرض العام... اللي له علاقة بالحياة العامة ده شيء تاني".

وعن المنشور الذي مازح فيه نجله "عمر" عندما كتب أنه أخذ "الكوتشي" وملابسه، مازحته الحديدي: "بتعايره ليه؟"فأجاب:"ده كان في مناسبة تكريمي في إحدى الجامعات، وكنت متوتر شوية، لأني سعيد إن ابني شايفني في لحظة نجاح أو تقدير أو تكريم".وحول ما إذا كان يشعر بأن التقدير أو التكريم جاء متأخرًا، علّق عبد الوهاب:"لا، مابحسش بكده... أنا مؤمن إن مافيش حاجة بتيجي متأخرة ولا بدري. كل شيء ليه ميعاد.

وأردف: " يعني مثلًا، لو دور زي (طارق كساب) في القاهرة كابول كان جالي قبلها بعشر سنين، مكنتش هعرف أعمله. ولأن كل يوم بيعدي على الإنسان، مش الفنان بس، بيزود مخزونه وخبرته الحياتية والإنسانية مع الوقت".