أحمد عبد العزيز: عمرى ما رفضت أسلم أو أتصور مع حد من جمهورى

أصدر الفنان أحمد عبد العزيز، بيانا صحفيا على حسابه بموقع فيس بوك، كتب فيه: "انتشر مؤخرًا مقطع فيديو اتفهم غلط على إني رفضت أصافح شاب من الجمهور الحقيقة إن الموقف كان سريع جدا أنا داخل الفعالية متأخر وبجري عشان أركب الأسانسير واطلع لمكان العرض، ولما شفته واقف افتكرت إنه بيفتح لي الطريق وأنه من ضمن المنظمين، ومخدتش بالي إنه بيمد إيده للمصافحة".

وأضاف أحمد عبد العزيز: "عمري ما رفضت سلام أو صورة مع أي حد من جمهوري، بالعكس.. أنا دايمًا بشوف إنكم السبب في نجاحي، ومحبتكم أكبر دعم ليا اللي حصل كان سوء فهم، وأتمنى الناس تتفهم إن في لحظات سريعة ممكن تتفسر غلط انا واحد منكم".

وكان الفنان أحمد عبد العزيز قد علق على واقعة رفضه مصافحة شاب وتداول المقطع بشكل كبير على مواقع التواصل الاجتماعى.

وقال أحمد عبد العزيز: "الموقف غاية فى البساطة، كنت رايح أحضر فعاليات مهرجان سينمائى فى مركز الإبداع، وكنت متأخر حوالى 10 دقائق، وبجرى علشان ألحق المهرجان، وأنا داخل وبحاول أدخل الأسانسير ففى مجموعة من الشباب وواقفة، وأنا شاورتلهم بدماغى بمعنى أهلا ودخلت جرى، ويبدو إن منهم أحد الشباب بيمد إيده علشان يسلم عليا وأنا مخدش بالى".

تابع أحمد عبد العزيز خلال مداخلة لبرنامج "العاشرة" المذاع على قناة إكسترا نيوز، تقديم الإعلامى الدكتور محمد سعيد محفوظ، بعدها مشيت بسرعة علشان أدخل الأسانسير، وفوجئت بعد انتهاء المهرجان بهذا المقطع المنتشر ومحقق مشاهدات عالية وتعليقات سلبية من ناس كتير".

ونفى أحمد عبد العزيز أن يكون مغرورا أو متعاليا على هذا الشاب، قائلا: "أنا راجل بسيط وغاية فى البساطة وشديد التواضع، ومفيش فنان عاقل يتكبر على جمهوره أو يرفض مصافحة حد، ودى مش أخلاقى ولا طبيعتى، أنا راجل ابن بلد".

ووجه أحمد عبد العزيز رسالة للشاب قائلا:" لو كان زعل أو خد على خاطره فهو فى النهاية ابنى ومستعد أطيب خاطره وبقوله مخدتش بالى انت بتحاول تسلم عليا، وانا الشباب بالنسبة ليا مهم جدا فى بلدنا اللى أكتر من 60% من تعدادها فى سن الشباب".

وأكد أحمد عبد العزيز:"أنا من الداعمين للشباب، وهو اللى هيحافظ على البلد، ومصر ستظل فى خير ومحفوظة".