هاجر أحمد: أنا من طنطا وعندى 9 إخوات و”حكايات بنات” الأقرب لقلبى
تحدثت الفنانة هاجر أحمد عن أقرب دور لقلبها وهى شخصية " آش" فى مسلسل حكايات بنات، قائلة خلال لقائها مع الإعلامية منى الشاذلى فى برنامج معكم، أمس الأربعاء "حكايات بنات قريب من قلبى أوى وكنت بقعد على الورق كلمة كلمة وحكايات بنات جالى كنت مسافرة برة مصر وكان ناقص 10 أيام وارجع كلمونى قالوا لى فى مسلسل الجزء الرابع عاوزينك معانا فيه قلتلهم ابعتولى الورق أشوفه".
وتابعت "بعتوا ليا أول 5 حلقات عجبنى أوى دور آش حسيت إنى ممكن أعمل منه حاجة قوية قلتلهم إنتم عاوزنى امتى قالوا هنصور الأسبوع الجاى قطعت رحلتى ونزلت على طول أنا معاكم أنا جايه من كتر ما أنا حبيت الدور".
وأضافت "أنا عشت فى طنطا ومدرستى كانت فى طنطا واحنا 9 أخوات وأول ما بابا اتوفى إخواتى نزلوا القاهرة عشان شغلهم ونزلنا كلنا سوا عشان نبقى مع بعض وأنا بتعود وبتأقلم بسرعة وخلصت ثانوية عامة ودخلت فنون مسرحية عشان حبتها وخلصت آداب علم نفس عشان أهلى".
