جمال حمزة: الحمد لله إنى ما خلفتش ولد.. وتوهت محمود محمود فى الملاهى

أكد جمال حمزة نجم الزمالك السابق أنه حاليا غير مرتبط بعد انفصاله عن زوجته أم ابنتيه، جميلة 16 سنة وخديجة 12 سنة، وقال جمال حمزة فى تصريحات خاصة لبرنامج "بره الملعب " مع مها السنباطى على إذاعة أون سبورت إف إم، "بناتى هما كل حياتى، ودائما البنات مع باباهم ألطف بكتير والتربية والكونترول عليهم أسهل، كنت عاوز أخلف ولد لكن بعد كده قلت الحمد لله إنى ما خلفتش ولد، حكمة ربنا وخصوصا لو كان طلع لى كانت هتبقى المشكلة أكبر لأنى كنت طفل شقى وصعب جدا" .

وأضاف حمزة، "جميلة بنتى الكبيرة كانت بتلعب باسكت لحد فترة قريبة ومقتنعة إنها عاوزة تلعب كورة، وأنا عندى إحساس إن كرة القدم لعبة مش بناتي، هى بتلعب عشان تمارس رياضة فأنا بميل للألعاب الجماعية وفى نادى الصيد عاملين مدرسة باسكت ومهتمين باللعبة دى، خصوصا للبنات وأصحابهم كلهم موجودين هناك، لحد ما لقيتها مش مقتنعة وتترك تمرين الباسكت وتروح تلعب كورة، وتتفرج معايا على الماتشات وهى زملكاوية جدا وبتحب ريال مدريد، عشان كدة بقول جميلة شبهى شكلا وموضوعا فى كل حاجة حتى فى الطباع فى حب الكورة وحتى مركزها مهاجم، أما خديجة فهى فى فريق الباسكت بنادى الصيد أيضا وبتشجع برشلونة فدايما عندنا انقسام فى البيت.

وأكد جمال حمزة أنه كان طفلا شقيا لكن فى نفس الوقت غير مؤذي، كنت عاوز أسيب كل حاجة عشان ألعب كورة، ولم أكن ملتزما فى المدرسة ولكن غير مشاغب.

أما عن المواقف التى لا ينساها قال حمزة، كنا دايما نعمل مقالب فى بعض خصوصا لما كنا فى قطاع الناشئين فى الزمالك وفاكر مقلب عملناه فى محمود محمود وكان وقتها قادم للقاهرة ولا يعرف شيئا وأخدناه ورحنا ملاهى السندباد، وتوهناه وقعد يلف علينا ساعتين وإحنا ماشيين وراه عمالين نضحك لحد ما فقد أعصابه وانهار، فحياتنا كلها كانت مواقف ومقالب فى بعض لدرجة إنى كنت دائما أركب معاهم مواصلات رغم إن بيتى جنب النادى عشان المقالب اللى بنعملها طول الطريق، متعة رهيبة.

وبعيدا عن الملعب قال جمال حمزة، التلفزيون متعتى الأكبر، بقعد قدامه ومتحركش بحب كل أفلام عادل إمام وإسماعيل يس والمسرحيات الكوميدية، باختصار أنا كائن بيتوتى جدا وبحب القعدة فى البيت قدام التلفزيون.

وعن تجربته فى التمثيل قال، كانت فى فيلم "الزمهلاوية" ومسلسل "ريح المدام"، مش بعتبرها تجربة فى التمثيل لأنى كنت طالع باسم وصفة جمال حمزة، وكل التعليقات كانت بتقول إنى كويس مكنتش خايف من الكاميرا ومكانش فيه إعادات كتير، ومن المواقف التى لا أنساها فى "ريح المدام" عندما دخلت فى خلاف مع أكرم حسنى حول شخصية أبو حفيظة التى يظهر بها فى برنامجه، مكنتش حابب الشخصية وشايف إن أكرم عنده كوميدى أفضل من كده كتير وهو زعل لما قلت له كده وفهمى تدخل وولع الدنيا بيننا بس أنا كنت مصر إن أكرم كوميديان جامد بعيد عن شخصية أبو حفيظة.

أما عن المواقف المحرجة التى يتذكرها "بره الملعب" قال حمزة: كنت قاعد مع أصدقائى فى كافية وفوجئت ببنت تريد التصوير معى وبعد ما اتصورت ومشيت قالولى إن دى عروسة وتركت حفل الخطوبة اللى كان فى نفس المكان عشان تتصور معى وطبعا سألت على خطيبها عشان مكنش ينفع تسيبه وتروح تتصور مهما كانت معجبة بالنجم اللى موجود فدى كانت أغرب حاجة حصلت معايا.