الفنانة شيرين: مش أول مرة أحلق شعرى ودى وراثة عن أبويا

قالت الفنانة شيرين فى لقاء مسجل مع الإعلامى عمرو أديب لبرنامج الحكاية، الحمد لله أنا حلوة، أنا كويسة، بس كلام الدكتور اللى كان معاك أول امبارح كلام محترم، بس ما فيش مرض نفسى لكن فيه عدم اتزان، أنا نزلت شغلى علشان بناتى شافونى كده.

وأضافت: لم يكن أمامى غير كده، أنا حاسة أن دماغى بتفرز أفكار طول الوقت ولو سبت دماغى هتاكلنى، وأنا عملت كده لأن هو نفسه أنا ما كنتش حلوة فى عنيه، عملت كده علشان هو ما يشوفنيش حلوة، والفرق بين حلاقة الشعر والطلاق يوم واحد، حلقت شعرى قبل يوم واحد من الطلاق ودى مش أول مرة أقص شعرى، فاكر لما قولت إنى طالعة علشان أضحك الناس وقالوا عليا إنى كنت بتريق على البلد، كنت مدبوحة ودبحونى أكتر وقتها، والأستاذ هانى شاكر اللى دافع عن ميريام فارس وما دافعش عنى ساعتها تعبنى جدا، وكون النقابة تعملى تحقيق، أنا عمالة أخد على دماغى لكن ربنا كريم مهما عملوا الناس اللى ربنا واقف فى ضهره الناس مش هتكسره.

وأكدت قائلة أنا أقصر فى حق نفسى لكن لا أوذى أحد، ودى وراثة عن والدى، هو أصوله تركية وهما بيمتازوا بالقوة والجسم العريض والشعر الكثيف الأسود، ولما كان يزعل كان يشيل شعره كله، وأنا ورثتها عن أبويا، أنا غير أخواتى وأنا اللى حلقته بنفسى وبعدين جبت حد يخليه طول واحد.

وتابعت: الإنسان الحساس بزيادة ممكن يؤذى نفسه علشان يعاقب نفسه وأنا كنت بعاقب نفسى، أنا غلطت فى اسمى ومكانتى وقدرى.