رانيا فريد شوقي: عمري ما حوشت وفلوسي دايما طايرة
قالت الفنانة رانيا فريد شوقي: عمري ما حوشت ولا أنا ولا أبويا وفلوسي دايما طايرة، وبناتي مش بيحوشوا وطالعين زيي، رغم إني جبت لهم حصالة كذا مرة بس مفيش فايدة، وأنا من الشخصيات اللي مبدأها "هين قرشك وما تهينش نفسك".
وأضافت، خلال مداخلة هاتفية لبرنامج زق عجلك الذي يذاع علي شعبي اف ام والبرنامج من تقديم شيماء السباعي وتامر جابر: بنتي ملك ميالة للفن زيي، بس قلت لها تخلص دراسة الأول ونتكلم، وعن والدها الفنان فريد شوقي فقالت: بابا الله يرحمه اتأثر بشخصية "عوض" في مسلسل "البخيل وأنا" وجرب فينا حاجات كتير وقت تصوير المسلسل، ودايما يقول لي أنا وإخواتي أنا مش هسيب لكم فلوس، بس هسيب لكم شهادات تجيبوا منها فلوس.
وذكرت أن الأجيال الجديدة عندها وجهات نظر أوروبية، إنها مش لازم تاخد شهادة، وبنتي ملك قالت لي أنا عايزة آخد كورس تمثيل ومش لازم أدخل الجامعة، ودوري في حياة ولادي إني حيالله أمهم، والجيل الجديد بيعمل اللي هو عايزه.
وتابعت: بصور حاليا مسلسل "أبوالعروسة" الجزء الثالث، وبكمل تصوير مسلسل "الحلم"، ومش شايفة إن فيه فرق بين مسلسلات رمضان والمسلسلات اللي بتتعرض خارج رمضان، وأهم حاجة من وجهة نظري اختيار الورق الجيد، وده اللي اتعلمته من بابا، إن راس الهرم هو السيناريو.
أما عن زوجها فقالت: "جوزي عامل لي دعم كبير في شغلي، لأن مهنتنا صعبة جدا ومالهاش مواعيد، ومش أي راجل شرقي يتقبل طبيعة شغلانتنا ولازم يكون متفتح ومؤمن بكيان المرأة".
واختتمت: برفض الظهور في البرامج اللي بتتدخل في الحياة الخاصة، والمذيعين اللي بيعصروا الفنانين ويقعدوهم على كرسي الاعتراف لو إحنا كمان تدخلنا في خصوصياتهم وحياتهم الشخصية هنطلع منهم مشاكل كتير.
