مريم الخشت بالعكاز في أول ظهور لها بعد غياب

ظهرت الفنانة مريم الخشت بالعكاز وذلك بعد ابتعادها لفترة عن التواجد بموقع إنستجرام

روت الخشت في منشور لها تفاصيل الوعكة الصحية التي مرت بها خلال الفترة الماضية عقب تعرضها لكسر في قدمها كما تحدثت عن تجربتها المنتظرة في مسلسل "مجنونة بيك".

وكتبت الخشت ما يلي:

"بداية السنة دي كانت مختلفة.. واختلافها في حاجات كنت متعودة عليها بقالي سنين وكلها اتغيرت.. يعني السنة دي هي أول سنة مكنش في الردايو اللي بقالي فيه سنين، ومكُنش في رمضان لأول مرة من 5 سنين، ولأول مرة رجلي تتكسر وتخليني أقعد في البيت أطول فترة في حياتي في وقت بكل المقاييس اللي في الدنيا ماينفعش يحصل فيه كدهّ بس فعلاً ربنا كبير أوي و مش بيعمل حاجة وحشة، وأنا فعلاً مؤمنة بده!

مسلسل "مجنونة بيك" تجربة مختلفة أول مرة تحصل في الوطن العربي، أول مسلسل استعراضي غنائي.. كل الناس اللي بتشتغل فيه بتعمل أقصى وأكتر حاجة عندها عشان يطلع في أحسن شكل، عدد استعراضات كبير وأغاني بتتحفظ وبتتسجل قبلها بفترة، وتيجي يا مريم يوم 30 مارس بعد أول أسبوعين تصوير تٌقعي على رجلك بعد مشهد عادي جداً، بعد الوقعة رجعت كملت التصوير، وبين توقيف التصوير وإننا نكمل لوقوف تصويره شهر كامل!

كل التفاصيل والحاجات اللي عيشتها كانت مخلياني مش فاهمة إزاي هرجع بعد شهر أقدم أكتر من 13 استعراض! اختفيت فترة طويلة، وبعدها رجعت أصور وصورت كل الاستعراضات وانا رجلي لسه فيها مشاكل بس حماسي لكل حاجة كان مخليني أحسن، متحمسة لكل حاجة حصلت في المسلسل اللي بتشرف إني اشتغلت فيه.

شكراً لكل الناس من المنتجة الجميلة سالي والي وحبايبي علي فايز وأحمد جمال.. والمخرج صديقي الجميل جو بوعيد، وحبيبي مدير التصوير أحمد زيتون و مصمم الاستعراضات الهايل هادي عواضة، والكاتب الخطير و صديقي عمرو مدحت، المزيكا اللي قدمها ومن أكتر الناس اللي شجعتني مصطفى الحلواني، والميكب آرتست حببتي آية عبد الحميد وزمايلي وأصدقائي اللي وقفوا جنبي جدا أمير المصري وآدم الشرقاوي وانتصار وإنجي كيوان ومراد مكرم، ولتيم الإخراج اللي حرفياً "شالني" المسلسل كله بعد الوقعة، ولكل الناس اللي اشتغلوا وطلع عنيهم عشان المسلسل يخرج بأحسن شكل.

متحمسة جداً تشوفوا "راندا" ومتحمسة تقولولي رأيكم.