اللواء جمال عوض صرفنا 91% من معاشات التراكمات القديمة.. ولا توجد أزمة في السيستم الجديد
أكد اللواء جمال عوض رئيس الهيئة القومية للتأمين الاجتماعي، أن ما يثار عن وجود "أزمة سيستم المعاشات" غير دقيق، مشيراً إلى أن الهيئة تواجه تحديات في معالجة بعض البيانات التاريخية، وجارى العمل على حلها.
كان لبوابة الدولة الاخبارية حوارا مع سيادة اللواء جمال عوض رئيس الهيئة القومية للتأمين الاجتماعي ليستعرض لنا مايثير حول منظومة السيستم الجديد
س: سيادة اللواء.. سمعنا إن كان فيه توقف لبعض الخدمات خلال شهر مع بداية السيستم الجديد. إيه السبب؟*
ج: أيوه مظبوط. إحنا ما وقفناش خدمة الطباعة، لكن كان فيه حاجات مرتبطة بربط بيانات جديدة وتعديل في "الداتا" كان لازم تقف مؤقتاً.
فطبيعي اتراكم عندنا خلال الشهر ده شوية طلبات صرف كتير.
س: سيادة اللواء.. يتداول عبر بعض وسائل الإعلام مصطلح "أزمة سيستم المعاشات".. ما تعليقكم؟*
ج: اسمحلي أبدأ بتصحيح المسمى. اللي موجود ده مش أزمة، دي تحديات في نظام معلومات جديد أطلقناه يوم 29 مارس. النظام ده تحول رقمي حقيقى بيقدم 170 خدمة تأمينية.
س: ما حجم العمل على النظام الجديد خلال الشهور الماضية؟*
ج: في 4 شهور استقبلنا 8.6 مليون مواطن في مكاتبنا. منهم 5 ملايين طلبوا خدمة فورية زي برنت التأمينات واتقدمت فوراً. و3.6 مليون طلب محتاج شغل داخل الهيئة، و3 خدمات فقط من الـ170 متعلقة بصرف المعاشات.
س: وماذا عن صرف المعاشات الشهرية؟*
ج: صرفنا 4 صرفيات شهرية بإجمالي 180 مليار جنيه من المنظومة الجديدة، بينها زيادة 15% في يوليو. كمان صرفنا 236 ألف حالة صرفية يومية بقيمة 7.7 مليار، و6 ملايين عملية تحصيل إلكتروني بـ56.8 مليار.
س: ماذا عن شكاوى التأخير في ربط المعاشات؟
ج: ربطنا 167.5 ألف معاش جديد. 29 ألف حالة منهم خلصت في أقل من 3 أيام. هدفنا نوصل لـ85% خلال 3 أيام بنهاية السنة. لكن هيفضل فيه ملفات فيها مشكلة بيانات تاريخية ممتدة 40 سنة، ودي محتاجة استيفاء.
س: كم عدد حالات التراكمات القديمة وما موقفها؟*
ج: كان عندنا 45,987 حالة. تم الصرف لـ42,254 حالة بنسبة 91%. الباقي 3,733 حالة، منهم 3,008 منتظرين المواطن يجيب مستندات ناقصة، و725 تحت التفتيش. وعدنا البرلمان ورئيس الوزراء نخلصها في أغسطس.
س: تعلم حضرتك أن الاعلامين والصحفيين هم حلقة التواصل بين المواطنين لتوصيل شكواهم أو مطالبهم للمسؤليين فكيف يتم التواصل السريع ؟*
ج: عملنا مكتب إعلام لتلقي الشكاوى وحلها فوراً. النظام الجديد بيحقق شفافية وسرعة، وبنشتغل ليل نهار عشان نوصل لخدمة تأمينية لائقة.
س: عايزين نعرف إيه الإجراءات المتخذة لتأمين بيانات المؤمن عليهم وأصحاب المعاشات وحمايتها من الاختراق؟*
ج: تأمين البيانات على أعلى مستوى. البيانات دي موجودة داخل مراكز بيانات الدولة المصرية، بأعلى درجات السرية والحماية.
وفي نقطة مهمة عايز أوضحها عشان خبر بيلف كل 8 شهور: موضوع إن حد "اخترق قواعد بيانات التأمينات وعنده بيانات للبيع". القصة دي من سنة 2023 ونفيناها رسمياً. ده كان شخص عمل هاك على أكتر من جهاز وجاب شوية بيانات ولزقها جنب بعض وقال إنه اخترق التأمينات. وده مش حقيقي ومحصلش. بياناتكم في أمان.
س: هل السيستم الجديد سيطبق في محافظات معينةام فى كل المحافظات وما الجدول الزمني للتعميم على جميع المحافظات؟*
ج: السيستم مطبق على مستوى الجمهورية من أول يوم 29 مارس. مفيش تدرج محافظات. كل المكاتب شغالة على النظام الجديد في نفس الوقت.
س: ماذا يفعل المواطن الذى كان لديه مدد في أكتر من محافظة؟*
ج: دي كنا حللناها بمنشور من سنة 2022. قبل ذلك كان المواطن بيلف على كل مكتب في كل محافظة يجيب مدته. دلوقتي السيستم بيقرأ أوتوماتيك. حضرتك عندك 5 مدد في 5 محافظات؟ السيستم يطلب من كل مكتب يأكد المدة بتاعته ويصححها لو فيها أخطاء. واصبح فيه إلزام.. مفيش ملفات هتفضل معلقة تاني.
وبنأكد إن أي إجراء في التأمينات بيعمله اتنين: مسجل ومراجع. عشان نضمن الدقة.
س: في حالة انقطاع الإنترنت.. هل نقدر نشتغل يدوي تاني؟*
ج: الشغل اليدوي موجود ومتاح في أي وقت كخطة طوارئ. بس خليني أقولك الأنظمة القديمة كانت "نص آلية". كان الموظف يحسب بإيده وبعدين يدخل الناتج النهائي على الحاسب. ده مش نظام آلي كامل. دلوقتي عندنا بدائل للطوارئ.
س: وكيف سيتم التواصل مع المواطنين في ظل النظام الجديد؟*
ج: المنصة الإلكترونية الجديدة هتتيح للمواطن حاجتين مهمين:
1. يقدم الطلب بتاعه وهو جالس في بيته.
2. يتابع حالة الطلب داخل التأمينات ويقدم شكوته من غير ما يروح المكتب.
كمان بنتعاقد حالياً على إطلاق صفحات رسمية للهيئة على فيسبوك وإنستجرام وكل وسائل التواصل. عشان نبقى قريبين من الناس.
وأكبر دليل إن الناس متقبلة الرقمنة: إحنا لغينا 6 مليون كارت صرف معاش من سنة 2022 و 2023 وحولناهم لكروت "ميزة" أو حساب بنكي.. والناس شغالة عادي.