الشاعرة شيماء غريب تكتب .. هي الظروف

هي الظروف

لسه قادرة تنبتي رغم الظروف

لسه لونك ضيه فاتح وسط فراغ وضباب وخوف

لسه طلة وليكي هلة واقفة شابة تقولي أشوف

لسه حاسة بالسعادة وانتي شايفة أحزان ألوف

انتي ايه ما تفهميني؟!

يا كلمة غامضة مابين حروف

انتي بالنسبالي اسم في قايمة تايهة مابين كشوف

حلو لونك رغم إنه غيور تملي
بس غيرته محلياه ومخلياه أحلي لون فوق الرفوف

بصي جنبك واوعديني تصمدي ماتدمعيش وماتخافيش واوعديني تنبتي ما توقفيش
وأوصفيلي شايفة إيه وارسميلي رسمة حلوة بالكفوف

ساكتة ليه...؟!
خايفة ليه...؟!

مش كنتي لسه بتلمعي
مش كنتي من لحظات قادرة تعلي وتسطعي إيه جرالك
أوعي أسمعك تقولي اه منها الظروف

قويني يلا وجمعيني اديني روحك تسكن الروح جوه مني وبعدها امشي وسبيني ميهزنيش عيشة الكهوف

مبخافش برد ولا عواصف وفي الشدايد جلدي صوف

هقولك ايه وأحكيلك ايه دي ياما دقت علي الراس دفوف

غلوا البضايع وخزنوها هشوفلي أخ يقاسمني ماله يبقي الربيع وأنا إبن عوف

هيبنوا سد وتجف أرضي هزّمزم أنا وأجيبها لو كانت في جوف

معايا ربي منا دعيته وأنا بطوف

دي هتبقي عال منه الإجابة منا السؤال هو الرؤوف