باسم يوسف تعليقا على انتقاده للحريات فى أمريكا: ”أنا زبون طماع”
علق الإعلامي باسم يوسف على انتقاده المتكرر للحريات في الشرق الأوسط وحتى في الغرب، وقال: "العيب فيا، العيب فينا كلنا، احنا اللي وحشين".
وقال خلال فقرته ببرنامج كلمة أخيرة الذي يذاع على قناة on: "أنا بسمع التون ده كتير أوي، سواء في مصر أو أمريكا، الناس بتمن علينا، مش تحمد ربنا أنك بتتنفس؟ أه يا سيدي أنا واحد طماع، أنا عاوز حريات أكتر ومساحة أكتر، أنا زبون وليا طلبات، وفي مطعم بيعلن عن نفسه ويقولك طلبك عندي، وأمريكا بتقول أنا عندي حريات قول اللي أنت عاوزه، دخلت ملقتش الخدمة المطلوبة، أه في حريات لكن مش زي ما بيتقال، اعترضت على ده حقي كزبون".
وأضاف: "صحيح الخدمة في المطعم ده اللي هو أمريكا، أفضل من مطاعم كتير برة، لكن ده مش في مستوى الوعد اللي أنت وعدتهولي فبعترض، لأن أنا زبون، وكل بلد في الدنيا لها براند، وأنت كزبون بتشتري البراند ده، يا يعجبك يا اما لا، وأمريكا بلد الحريات، ده البراند بتاع أمريكا".
وقال: "دول الشرق الأوسط مش ده البراند اللي بتعلن عنه، أي حياة في الدنيا شروة واحدة، وأي طريق في الدنيا بتمشيه لأخره، أنا حياتي هنا في أمريكا أنا راضي عنها الحمد لله، في حاجات مش بتعجبني أكيد، لكن وأنا موجود هنا في مميزات وعيوب، وأنا هنا عشان مواطن وواجبي كمواطن أصرخ وأقول في حاجات مش عاجباني".
كما علق الإعلامي باسم يوسف، على تعرضه للسب من الكثيرين، خلال الفترة التي كان يقدم فيها محتوى.
وقال: "والدتي الله يرحمها، طلبت مني لينك عشان تدخل تتفرج عليا والفيديوهات بتاعتي، وعلمتها ودخلت، وكانت أسوأ غلطة عملتها في حياتي، لاقيتها بتقولي يا باسم الناس بتشتمنى، وبتقولي لا أنا محدش يشتمني، ودي بني آدمة طبيعية، شافت ناس بتعمل حاجات غير طبيعية، ناس بتشتمها وهي في بيتها لمجرد أنها أم لواحد بيعمل فيديوهات على يوتيوب".
وتابع: "أمي معرفتش تستمتع بالبرنامج بتاعي".
وعلق باسم يوسف: "في ردود أفعال كتيرة لما ظهرت في الحلقة اللي فاتت، وكنت متوقع ده، وأكتر حاجة مش هقول ضحكتني، بس استغربتها، انهم قالوا ده مش باسم، ده باسم اتغير ومبقاش زي ما كان".
وتابع: "طب معلش، هو أحنا كلنا أخبارنا ايه، محدش اتغير؟ 11 سنة عدت عالناس، هي الناس زي ما هي؟ ولو أنتوا زي ما أنتوا طول الفترة دي، فهو شيء مثير للإعجاب، وأنا معودتش باسم بتاع 2011".
وقال: "أنا واحد تاني عنده طموحات مختلفة وظروف مختلفة وعندي 51 سنة، ومستمتع أني كل شوية بتغير وبتعلم حاجات جديدة، ومصر بتتغير والظروف بتتغير، والأحاسيس بتتغير، أنا مقدر وممتن أن الناس عاوزة باسم بتاع البرنامج بس في الحقيقة الناس عاوزة تعرف الترمومتر رايح فين والاتجاه رايح فين واللقاء هينتج عنه إيه".
