بعد تحريمها على النساء اتباع الجنائز.. «فريدة سيف النصر» تواصل إثارتها للجدل: «أنا مش ظلامية»
تواصل الفنانة فريدة سيف النصر، إثارتها للجدل بعد كتابتها منشورًا مطولا جديدا، عبر حسابها الرسمي على موقع التواصل الاجتماعي “فيس بوك”، وذلك بعد سلسلة منشورات سابقة تصدرت أحاديث السوشيال ميديا خلال الساعات الماضية، تبرر خلالها سبب غيابها عن جنازة الفنانة القديرة الراحلة دلال عبد العزيز، التي شيعت ظهر أمس الأحد، من مسجد المشير بالتجمع الخامس.
وكتبت “فريدة” عبر حسابها الرسمي منذ قليل، “طيب دي واحدة بعتتهولي خاص. ومش هابطل انشر حاجه نستفهم بيها من بعض ويارب نستفيد بمناقشتنا وياترى فعلا أحكام من حقي اعرف واخاف. كل اللي في الدنيا حلم وأنا بادور عاليقظة.. ولا أنا ظلامية ولا عبط”.
وكتبت: أحكام شرعية مهمة جدا:
إن المسح في الوضوء ماينفعش إلا على شراب تقيل وطويل يغطي كل القدم إنما القصير اللي بيغطي جزء من القدم مينفعش ويستحسن الوضوء ذاته.
لما نسجد أول سجدة ونقوم نقول ربي اغفر لي مرتين ودي سنة.. وبعد كده نسجد السجدة الثانية ومن الركوع منقولش ربنا ولك الحمد والشكر.. والشكر غلط والأفضل نقول ربنا ولك الحمد حمدا كثيرا طيبا مباركا فيه ملء السموات و الأرض.
نقول مع الآذان وعند حي على الصلاة وحي على الفلاح نقول لا حول ولا قوة إلا بالله.
لازم صوابع رجليك تتفرد كلها وقت السجود للأمام في اتجاه القبلة وليس للخلف.
لازم الرجل تتغطى كلها حتى تقبل الصلاة.
أيام الصيام اللى علينا لازم تتصام مينفعش تخرجى بدلها إطعام مسكين.
ركعتي الفجر خير من الدنيا وما فيها .. المقصود في الحديث الركعتين السنة اللي قبل صلاة الفرض.. مش المقصود الفرض نفسه.
ان تبديل الدهب القديم بدهب جديد ودفع الفرق يعتبر ربا.. و الأحسن تبيعي الدهب القديم وتقبضي قيمته الأول وبعدين تشتري اللي انتي عايزاه.
ان مش شرط لبس الحجاب وأنا بقرأ قرآن في البيت.
لو في شخص بيصلي وانتي مضطره تعدي من قدامه.. مينفعش تعدي قبل موضع سجوده لازم نحط أي حاجه زي كرسي أو ما شابه وبعد كده نعدي.
دعاء الانتهاء من الوضوء:
أشهد ان لا اله الا الله و ان محمد رسول الله اللهم اجعلني من التوابين واجعلني من المتطهرين
تتفتح لك أبواب الجنة كلها و تدخلي من أي باب.
وكانت الفنانة فريدة سيف النصر، أثارت حالة من الجدل عقب نشرها عبر صفحتها، منشورا مطولا عن 30 نهيا للنساء، ومنها اتباع الجنائز.
وبررت “فريدة” موقفها من المنشور في تعليق لها قائلة: “على فكرة اتبعتت لي وحبيت أشاركها معاكم نفهم من بعض.. لكن مع الأسف فيه نفسيات صعبة.. هو أنا مش ممكن أرد زيكم واسب.. اللي بتقل أدبها.. لكن لأه ده بيبين التناقض للي عاملة متدينة.. لا تعرف كلمة طيبة صدقة ولا ذوق وهايلموا حصاد ألسنتهم في الآخرة.. وبعدين مش مجبورين أبدًا تدوروا عليا وتدخلوا بمنتهى الفظاظة والغل ده.. لا حول ولا قوة إلا بالله”.
