حلمي بكر يفقد أعصابه أمام نجل حميد الشاعري: عيب يا ولد أنا مبخفش
علق الموسيقار حلمي بكر على هجوم نديم الشاعري، نجل الفنان حميد الشاعري، قائلا: إننا نعيش في حالة من تدني الأخلاق ولا يمكن السكوت على مجتمع مصاب بالخلل، مشيرا إلى أن الموسيقى الحالية تشهد حالة من التراجع الكبير و"متردية".
وأضاف الموسيقار حلمي بكر في مداخلة هاتفية لبرنامج "خط أحمر" الذي يقدمه الإعلامي محمد موسى على قناة الحدث اليوم، كان لازم حميد الشاعري يقول لابنه عيب يا ولد، أنا اللي امتحنت حميد الشاعري في النقابة ومكنش عنده فكرة عن الموسيقى وحصل على عضوية انتساب بدعم من النقيب آنذاك الموسيقار أحمد فؤاد حسن".
وتابع الموسيقار حلمي بكر، "أنا رئيس لجنة الاستماع من قبل ما أنت تتولد، مينفعش ابنك يشتمني أنا مبخفش، المفروض يبدأ حياته بعمل فني مش بسباب".
وكان هاجم نديم، نجل الفنان حميد الشاعر، الملحن حلمي بكر، بعد هجومه على والده خلال ظهوره بالبرامج التلفزيونية، وقال "نديم" عبر "فيسبوك": "أستاذ حلمى لو محتاج مساعدة الكابو مش حيتأخر عليك، لكن ما ينفعش كل ما تتزنق تروح برنامج تجيب سيرة حميد الشاعري اللي للأسف تاريخك ميجيش تمن تاريخه ولا فنيا ولا أخلاقيا للأسف، ٣٠ سنة من عمرة ما بيعملش حاجة في حياته غير التقليل من الناس ومن الفنانين ومن أعمالهم".
وتابع نجل حميد الشاعري: "اوعى حضرتك تفتكر إنك محطوط في خانة الإنسان المحنك، لا للاسف، فرق كبير أوى بينك وبين الكابو حتى في الفكر الموسيقى والمعاملة مع الناس، الكابو كبير مقامة ومش بيرد عليك عشان هو اكبر من كده واكبر منك بالذات، ودايما بيقولي ما تردش على حد، لكن ولاده كبروا ومش حيسمحوا انك تقطع في ابوهم".
وأضاف نجل حميد الشاعري: "هو حضرتك بجد فاكر أن حميد هو اللي بوظ المزيكا في مصر؟ المقسوم إلى حضرتك بتتكلم عليه هو اللي واكل بقاله ٣٠ سنة مع كل الفنانين، وهو سر الاستمرارية والنجاح، مفيش البوم بينزل غير ومقسوم الكابو رانن في الودن، لما مذيع صابغ شعره ابيض وفي اللفة يسألك سؤال زى ده، المفروض ردك يبقى تربوى قبل الفني إنه ازاى يسأل السؤال بالطريقة دي، لكن حضرتك كنت حتطير من الفرحة عشان السؤال في تقليل للكابو".. وأختتم نجل حميد الشاعري: "حاول يا أستاذ حلمى تكسب الناس عشان الدنيا فانية. متبقاش خسران السيرة الطيبة وكمان الناس".
