الشاعرة شيماء غريب تكتب .. أنا الشعب

أنا الشعب اللي أبان غلبان

أبان كسلان أبان بهتان

أبان هادي أبان ساكت أبان دبلان

أبان متغمي مش فاهم أبان حيران

لكن ودين من خلقك أنا البركان

أنا الثائر ولو هغضب هفيض فيضان

أنا الشمعة أم نار قايدة في ليل كحلان

أنا وقت أم أقول هسند أكون عمدان

أنا السد ومفيش سد يخليني أبات عطشان

أنا الشعب اللي أبان صامد أبان جامد أبان شبعان

بلاش تيجوا علي أصولي وعلي قصوري وعلي تاريخي شاهد يا زمان

بلاش تيجوا علي قوتي دي فيها موتكم مش موتي
بقيتوا بطون بقيتوا حيتان.

بقيتوا كروش ولا بتشبع بقيتوا غيلان

أنا الشعب اللي يتكحل عشان بلده تعيش في أمان

أنا الشعب اللي بانيها وشوف كباريها راح تشهد تقول شقيان

أنا الشعب ومين غيري بني فيها هنتحاسب هتلاقني أنا الكسبان

أنا الشعب ومستني بكرة أبو كف متحني وثمر الخير يكون طارح علي الأغصان

بلاش تيجوا علي الغلبان بلاش تيجوا علي الغلبان

أنا الشعب في مدرستي عرف الصبر معناه وهنصبر ولسه كمان

لكن ودين من خلقك هتتمادي هاكون بركان

أنا الشعب أنا المصري شاااهد يا زمان