كان الونس والعشرة.. الشيف هالة فهمي تنهار على الهواء أثناء نعي زوجها
انهارت الشيف هالة فهمي، من البكاء على الهواء، أثناء نعي زوجها، الذي توفي بعد صراع مع المرض الخبيث، قائلة: « حاسة إني لوحدي رغم كل الناس اللي حواليا».
وتستعرض " بوابة الدولة الاخبارية " أبرز ما قالته الشيف هالة فهمي في نعي زوجها الراحل، خلال السطور التالية:
هالة فهمي: أنا دوقت طعم المرار
نعت الشيف هالة فهمي زوجها، خلال برنامجها الذي تقدمه على قناة «هي»، قائلة: «لما أبويا مات محستش بالإحساس اللي حساه دلوقتي، وحتى أمي لما ماتت زعلت طبعا وحزنت، لكن الزعل والحزن على أمي وأبويا غير اللي أنا حساه دلوقتي، عارفين الجملة اللي بتتقال كده، أنا دوقت طعم المرار، أنا فعلا الفترة اللي فاتت دي أنا حاسة بمرار والوقت طعمه المرار حتى بوق المية طعمه مر حاسة إني لوحدي رغم كل الناس اللي حواليا».
الشيف هالة فهمي تنعي زوجها
وتابعت قائلة: «أول مرة أطلع حلقة وهو مش قاعد دلوقتي بيتفرج، كان عنده الساعة 12 ميعاد مقدس، حتى لما الفترة الأخيرة كان تعبان وساعات يغيب عن الوعي، كان يركز وقت البرنامج، والساعة 12 يشاورلهم ويطلب منهم يفتحوا التليفزيون، ومتعودة إني أول ما أخلص الحلقة جري عليه ونحكي أقوله على كل حاجة».
واختتمت الشيف نعيها: «هو الونس وهو عشرة العمر وحبيب العمر، هتقولولي هو في مكان أحسن وأرتاح، ربنا يجعل كل الألم اللي كان فيه شفيع ليه وفي ميزان حسناته، عشرة عمري».
وفاة زوج هالة فهمي
توفي زوج الشيف هالة فهمي، بعد صراع مع المرض الخبيث، وكانت كشفت عنه «هالة» في 31 يوليو، قبل رحيله يوم 4 أغسطس عقب أربعة أيام من كشفها عن معاناة زوجها.
وعانى زوجها من مرض سرطان الدم والنخاع، وكان يحتاج للعلاج الكيماوي، وأصبح الأمل الوحيد له هو زراعة النخاع من أحد أقارب المريض من الدرجة الأولى، لكن لم يمهله القدر الانتصار على هذا المرض الخبيث.
