الكاتب الصحفى صلاح ضرار يكتب ؛ مصر أحبطت محاولات استعمارها
إذا تحدثنا عن الأهداف الاستعمارية للنيل من مصر فإن التاريخ أكد للعالم كله أن الدولة المصرية بفضل جيشها الباسل وشعبها العظيم حققت انتصارات أبهرت العالم كله وأكبر دليل على ذلك أن أول المحتلين من الاستعمارا الهكسوس من أكتر من 3000 سنه صحينا من النوم لقينا الهكسوس محتلين البلد ،لحد ما اتمسكنوا ، وبعد ما كنا بنعطف عليهم ، سيطروا على مقاليد الأمور واحتلونا ، لكن طوال 250 سنة احتلال هكسوسى ،عمرنا ما اتكلمنا هكسوسى ،وفى النهاية طردناهم ، وفضلنا عايشين .
بعد الهكسوس
دخل الأشوريين ، واحتلونا 16 سنة ، ونفس الحكاية .. ما نطقناش حرف أشورى واحد .. ومشي الأشوريون .. وفضلنا عايشين .
الفرس صعب عليهم إن الأشوريين يحتلوا مصر وهما لأ ، قاموا احتلونا يجي 90 سنة ، وطلع الفرس من عندنا بيتكلموا عربى مكسر ، وفضلنا عايشين .
اليونانيون قالوا يعنى الفرس اللى بيعبدوا النار يحتلوا مصر واحنا لا ؟! فجهزوا الجيوش وهجموا على الفرس وطلعوهم ، وقعدوا مكانهم ، وكبر الإسكندر الأكبر عندنا ومات زى ما الكل هيموت .. وبرضو ما اتكلمناش يوناني ولا حاجة .
وفضلنا عايشين .
بطليموس خليفة الإسكندر ..قال يعنى الإسكندر أحسن منى .. وقام جايب الجيوش البطلمية وقعدوا عندنا يجي 300 سنة .. ولا نطقنا حرف بطليموسي واحد .. وفضلنا عايشين .
الخواجة الروماني أكتافيوس ما عجبوش الوضع .. وقالك لأ .. أنا مش ابن البطة السودا .. وقام باعت جيوشه وقعد عندنا يجى 360 سنة .. آكلين شاربين نايمين .. وفى النهاية ماتوا واندفنوا عندنا .. ولا اتغيرنا ولا نطقنا حرف اكتافيوسي واحد .. وفضلنا عايشين .
واحنا قاعدين بنعمل كوباية شاي على شط النيل .. ولسة هناخد بق من الكوباية .. لقينا البيزنطيين قاموا هاجمين على مصر واحتلونا 310 سنة .. وعااادى .. فضلنا قاعدين بنشرب الشاى وما بقيناش بيزنطيين ولا حاجة .. وفضلنا عايشين .
بعدها دخلنا فى الفتح الإسلامى .. ودولة إسلامية علي أموية على عباسية على طولونية علي اخشيدية علي فاطمية شيعية على أيوبية وفضلنا عايشين ..
المماليك .. عملوا الدولة المملوكية .. واحتلونا يجي 300 سنة قاوموا خلالها الصليبيين والمغول .. ورغم كدا ولا نطقنا حرف مملوكى واحد .. بالعكس هما اللى اتكلموا مصرى .. وفضلنا عايشين .الفرنسيين صعب عليهم شوية المماليك يستمتعوا بمصر ويحكموها ويسيطروا من خلالها على طرق التجارة .. قاموا سخنوا الأتراك سليم الأول .. وهجم على مصر .. وقتل #الأتراك سلطان المماليك قنصوا الغورى وشنقوا طومان باى .. واحتلوا مصر .. وما اتكلمناش تركى ولا حاجة .. وفضلنا عايشين ..
ولما الاتراك شموا نفسهم .. دعم الإنجليز محمد على وقلبوه على الأتراك .. وفضل هو وأولاده واحفاده فى مصر اكتر من 140 سنة .. وبسببهم شفط الانجليز خير البلد وخلونا متخلفين ومواطنين من الدرجة الخامسة .. لكن برضوا الحمد لله استحملنا .. ولا اتكلمنا ألباني زى محمد_على .. ولا تركى زى اللى عين محمد على .. بل بالعكس كل أولاد وأحفاد محمد على هما اللى اتكلموا مصرى .. وفضلنا عايشين .
الفرنسيين قالوا يعنى هو إحنا اللى مش حناخد من الدست مغرفة .. وقاموا داخلين مصر وقلبوا عيشهم 3 سنين وخرجوا وهما بيتكلموا مصرى .. وفضلنا عايشين .
الانجليز شربوا شاي بالياسمين مع الفرنسيين .. وقسموا الدول على بعضهم .. فطلع الفرنسيين من مصر على دول المغرب العربى بعدينا بشارعين .. واحتل الإنجليز مصر ٧٢ سنة .. ورغم كدا لا اتكلمنا فرنساوي ولا انجليزى .. وكلهم خرجوا من عندنا .. وفضلنا عايشين .
حتى الصهاينة لما احتلوا سينا بمساعدة انجلترا وفرنسا واغتروا بقوتهم وقالوا انهم القوة التى لا تقهر .. فاقوا من الغيبوبة والمصريين فوق دماغهم .. وجريوا زى الفيران وانتهى وجودهم فى سينا .. وفضلنا عايشين .
إحنا اتبهدلنا كتير .. واستحملنا كتير .. وشفنا إللى ما حدش شافه .. وخضنا حروب على مدار التاريخ بعدد شعر رأسنا .. ورغم كدا فضلنا عايشين .
إللى شفناة كمصريين طول السنين إللى فاتت دى كلها كتير .. ورغم كدا صمدنا لأكثر من ١٥٠٠ سنة احتلال بأسماء وأشكال مختلفة .. وعرفنا بشكل كبير جدا نحفاظ على هويتنا ولغتنا وعاداتنا وتقاليدنا مقارنة بدول وممالك أخرى أندثرت وتلاشت واصبحت تراث ، تفتكروا بعد كل دا ممكن مصر تضيع ؟ أنا بقول مستحيل االبلد دى لسة فيها أسرار كتير ،وهى محفوظة منذ فجر التاريخ ، وستظل محفوظة ليوم الدين والارض التى كانت سكنا وممرا للانبياء والمرسلين ،والتى قال عنها رب العالمين ادخلوها بسلام آمنين ستعود لها باذن الله مكانتها بفضل الله ثم بفضل أبناءها المخلصين .
علشان كدا دايما بقول ، ما تخافوش ، ياما دقت ع الراس طبول ، وكل اللى فات راح وفضلنا عايشين ببركة رب العالمين
