الشيف ريم من بيع الطعام بالشوارع والأندية إلى شاشات التليفزيون.. اجري ورا حلمك

عشقت الطبخ منذ نعومة أظافرها، فكان أجمل وقت تقضيه في حياتها هو أثناء تواجدها مع والدتها في المطبخ، وهى تشاهدها تضع التوابل والمكونات المختلفة من الخضروات لتطهى أشهى وأجمل الأكلات التي كانت تتذوقها، فحرصت على أن تتعلم منها أصول الطهى، حتى حولتها مع الوقت من هواية لمهنة، لتبدأ من بيع وجبات غذائية في الشارع لتنجح في أن تصل للشاشة الفضائية وتعرض هوايتها أمام الجميع.

تحدثت ريم حسن، الحاصلة على بكالوريوس تجارة قسم إدارة أعمال وزوجة وأم لأربعة أطفال، عن قصة كفاحها ونجاحها في مجال الطبخ، لـ "اليوم السابع"، حيث قالت: "كان نفسي الأول أدرس تربية موسيقية، لكن أهلى أصروا على إنى أدخل كلية التجارة، وبالفعل نفذت رغبتهم، لكن كنت متأكدة إنى مش هشتغل بيها، لأنى مش بحب الوظيفة الروتينية، وطول عمرى بحب أطبخ، من وأنا في إعدادى تقريباً كنت بحرص على حضور حصص التدبير المنزلى، وأطبخ بنفسى، وكان بابا الله يرحمه دايماً يشجعنى وكمان ماما كانت بتعلمنى الطبخ".

تابعت: "كنت بحرص دايماً على تطوير وصفاتى، من خلال متابعتى لبرامج الطبخ على التليفزيون، وكان بابا بيشجعنى ويقولى قومى أعملى الأكلة دى هتعرفى، وكنت بنفذها زى ما هى، ومع مرور الوقت، فكرت أشتغل من البيت وأعمل أكلات، وأبيع في اليوم المفتوح في الأندية والشوارع وكل حتة، وأحياناً كنت مش بنام عشان أسوى الأكل ويكون طازة والحمد لله، ربنا كان بيجبر بخاطري وكنت ببيع كويس، وفضلت كده واشتغلت فترة في نادى وقدرت أثبت نفسى بين الشيفات الرجالة، لكن مقدرتش أكمل في الشغل عشان أهتم بعيالى، وبعدين أشتريت عربية واستغليتها في إني أبيع عليها شغلى".

واجهت "ريم" بعض الصعوبات في بداية عملها بطهى وبيع الوجبات الغذائية في الشارع، والتي تحدثت عنها قائلة: "لما كنت ببيع الأكل في الشارع، وقفت أول مرة قدام كلية البنات، وطلبوا لى البلدية، وروحت وقفت قدام جامعة تانية كانوا طلبوا لى الأمن، لكن استقريت في الآخر ووقفت عند جامعة الأزهر، وكان الطلبة بيستنوا عربيتى، وكنت ببيع كل حاجة بعشرة جنيه، وبعمل دعوة هدية مع أي أوردر عشان أفرحهم".

تابعت: "انتشرت كورونا ووقفت شغل، وخسرت كل حاجة وجالى إحباط، وبعدها بفترة، رجعت اشتغل تاني، ورجعت أعمل أكل جاهز للحفلات والعزايم، وكنت بحاول أوفق بين بيتى وشغلى، وبنتى الكبيرة بتساعدنى، وزوجى أكتر واحد في الدنيا بيقوينى ويشجعنى".

نجحت "ريم" في أن توصل موهبتها للناس، من خلال مشاركتها في برنامج إذاعى كان يذاع في خلال شهر رمضان، على محطة إذاعة القاهرة الكبرى، وشاركت في تقديم فقرة طبخ ببرنامج "بالهنا" الذى يذاع على الفضائية المصرية، حيث قالت: "حد من الإعداد اتصل بيا وعرض عليا أكون في برنامج اسمه "أكلات في الأمثال"، مع المذيعة شاهيناز مصطفي، وكان بيتذاع في إذاعة القاهرة الكبري، في رمضان وطلعت فى 15 حلقة، بشكل يومى، مبسوطة بالتجربة جداً".

لم تكتفى "ريم" بتحقيق ما أنجزته من نجاحات في مجال الطبخ، الذى عشقته منذ طفولتها، ولكن تسعى لتحقيق المزيد والمزيد خلال الأيام المقبلة، حيث قالت: "عندي ثقة في ربنا إنه مش هيخيب ظنى، وبتمنى أن يكون عندى مطعم، أقدر أقدم فيه كل الأكلات اللى الناس بتحبها وبوزع شعرية باللبن وكسكسى على الزبائن".