الأديبـة شيـماء غريب تكتـب :قطّع دفاتـر العتاب

جرا إيه يا ليل..
هو مفيش في الدنيا غيري تسهّره...
همك تقيل...
كتب القمر تنزل لقلبي تحيره وتكدره...
ضيك قليل
كل النجوم مش قادره حتي تنوره..
جرا إيه يا ليل...
فين النسيم فين زهرك اللي عطّره
اشهد يا نيل...
علي وجعه ليا كل ليلة ضيع ربيع العمر فيا وبدله....

حيران يا قلبي...

مبقاش في ايدي غير إني أشوفك وأتوجع...

وفضلت اقولك هاتلي حد في يوم هجّر بعدين رجع

غاوي تفتّح في الجراح تحكي اللي راح وتعد كام واحد خدّع

ونقضّي ليل السهد كله دموع وويل مين يعني غيرنا اللي دفّع

لا ليل لحالك مرة رق ولا مرة يعني قمر خضّع..

هات دفتر الأوجاع وقوم....

مالهوش لزوم...
علي وشي تاني اعملي زووم..

عدّ الهموم
شوف كام علامة حزن فيا تكلمك.. دي سنين عذاب مش بس يوم...

واشهد يا ليل...
في سمايا كانت عاملة إيه فيا الغيوم...
كل السهاري يشهدوا.....« ما داقتش نوم»...

عاوز تطّول هاتلي صحبة يونسوني...

بضحكتك كحّل عيوني

بغنوة حلوة عن الهوي هات القمر غنوا اطربوني...

خلي السحاب يخبط في بعضه تنزل دموعه يسعدوني

يخضّر عودي اللي دبّل في سنين عجاف ما روتوني

قطع دفاتر العتاب وامحي ملامح ناس غريبة ظلموني....

نادي علي فجر الأمل علي يوم جديد

يصبح صباحي علي الندي فرحان سعيد

والشمس تبعت ضيها والأرض تطرح طرحها

هات اللي غايب من زمان وعاش بعيد....

وأكتب علي جدار القمر « فرحك أكيد»

أكتب علي جدار القمر فرحك أكيد

أكتب وهات حبر القلم أخفيه فـ دولابي...

ما أنا حبر قلمي كان السبب... جاف وعنيد...